XEBERVER.AZ

Kanada və Hindistan, Sih separatçı təşkilatı “Halistan Azadlıq Gücü”nün (KLF) lideri Hardeep Sinq Nijjarın öldürülməsindən 10 ay sonra qarşılıqlı şəkildə səfir təyinatı həyata keçiriblər.

Kanada Xarici İşlər naziri Anita Anand Kristofer Kuterin ölkəsinin Yeni Dehlidə səfiri olacağını açıqlayıb. Hindistan Xarici İşlər Nazirliyi isə hazırda İspaniyada səfir vəzifəsində çalışan Dineş Patnaikin Ottavaya göndəriləcəyini bildirib.

18 iyunda Kanadanın Baş naziri Mark Karni G7 sammitində Hindistan Baş naziri Narendra Modini rəsmi mərasimlə qarşılamış, tərəflər səfirlərin geri dönməsi barədə razılığa gəlmişdilər.

2024-cü il 14 oktyabrda Kanada polisi Hindistan hökuməti ilə əlaqəli zorakı cinayət fəaliyyətlərinə dair sübut təqdim etdikdən sonra, Kanada Ottavadakı Hindistan səfiri də daxil olmaqla 6 hind diplomatını ölkədən çıxarmışdı. Elə həmin gün Hindistan da cavab olaraq Kanadanın Yeni Dehlidəki səfiri və daha 5 diplomatı ölkədən çıxarmışdı.

Nijjarın qətli

“Sih dövləti” mənasını verən “Halistan” ideyasını dəstəkləyən KLF Hindistanın Pəncab əyaləti ilə yanaşı, Pakistanın Pəncab, Hayber Paxtunxva, Sind, Bəlucistan və Kəşmir bölgələrinin tamını və ya bir hissəsini Halistan ərazisi hesab edir.

Hindistanın terrorçular siyahısında adı olan KLF rəhbəri Hardeep Sinq Nijjar 18 iyun 2023-cü ildə Kanadada qətlə yetirilmişdi.

O vaxtkı Kanada Baş naziri Castin Trüdo Nijjarın öldürülməsinin arxasında Hindistan hökumətinin dayandığını bildirmiş, bundan sonra iki ölkə arasında münasibətlər ciddi şəkildə gərginləşmişdi.

Kanadada Hindistan vizası müraciətlərini qəbul edən BLS International şirkəti isə 21 sentyabr 2023-dən etibarən Hindistanın viza xidmətlərinin “əməliyyat səbəblərinə görə” qeyri-müəyyən müddətə dayandırıldığını açıqlamışdı.

Yenifikir.media

📧 info@yenifikir.media
📞 +994 55 977 79 81 (WhatsApp)