ABŞ Prezidenti Donald Trampın Ukrayna münaqişəsinin həlli məsələsinə yenidən qayıtması üçün əsaslar var. Bunu politoloq Dmitri Juravlyov Rusiya mətbuatına açıqlamasında deyib.Onun sözlərinə görə, bu ehtimal Rusiyada ABŞ prezidentinin xüsusi nümayəndəsi Stiv Uitkoff və Ağ Ev rəhbərinin kürəkəni Cared Kuşnerin səfərinin gözlənilməsi ilə bağlıdır.
“Bu səviyyədə insanlar sadəcə olaraq səfər etmirlər. Görüşün özü artıq siyasi hadisədir. Bundan başqa, biz amerikalı dəniz piyadasının azad edilməsinə razılıq verdik. Bu da təsadüfən baş vermir”, – Juravlyov bildirib.
Politoloq hesab edir ki, Tramp üçün Ukrayna iki səbəbdən vacibdir: Avropanın Kiyevə dəstək üçün ayırdığı vəsaitlərdən istifadə etmək və amerikalılara prezidentin beynəlxalq problemləri həll etmək qabiliyyətini nümayiş etdirmək.
“Əsas məsələ Trampın özünə görə, Ukraynada müharibəni başa çatdırdığını və qalib gəldiyini göstərən təbliğati görüntü yarada bilib-bilməyəcəyidir. Əgər yaxın seçkilərə qədər belə bir imkan yaranmasa, o zaman Ukrayna onun üçün əhəmiyyətini itirəcək və İran və ya başqa məsələlərlə məşğul olacaq. Ona piar lazımdır”, – politoloq yekunlaşdırıb.
Qeyd edək ki, avqustun 8-də Stiv Uitkoff və Cared Kuşnerin yaxın günlərdə Moskvaya səfər edə biləcəyi barədə məlumat yayılmışdı. Səfərin bir həftə–10 gün ərzində baş tuta biləcəyi bildirilirdi.
© Yenifikir.media
Arzu, təklif və şikayətlərinizi bizə bildirin