Tanınmış fotojurnalist Reza Deqati bu dəfə Çin Xalq Respublikasında keçirilən nüfuzlu beynəlxalq foto tədbirində Azərbaycan reallıqlarını gündəmə gətirib. 22 avqust–7 sentyabr tarixlərini əhatə edən “FIAP 9-cu Foto Görüşü” çərçivəsində dünyanın 40 ölkəsindən gəlmiş yüzlərlə fotoqrafla bir araya gələn sənətçi, yalnız peşəkar təcrübəsini deyil, həm də Qarabağ həqiqətlərini bölüşüb.
Çin Foto Sənəti Cəmiyyəti və yerli rəsmi qurumların dəstəyi ilə təşkil olunan tədbirdə Deqatinin çıxışı xüsusi maraq doğurub. O, illərdir müxtəlif ölkələrdə lentə aldığı fotolarla yanaşı, Qarabağda yaşananları da iştirakçılara təqdim edib. Fotojurnalistin sözlərinə görə, 400-dən artıq iştirakçının əksəriyyəti Qarabağ mövzusunda yalnız birtərəfli məlumatlara sahib idi. Bu isə həqiqətlərin beynəlxalq aləmdə hələ kifayət qədər tanıdılmadığını bir daha göstərib.
Deqatinin çıxışını dinləyən iştirakçılar onun həm sənət, həm də insanlıq dəyərləri barədə verdiyi mesajlardan dərin təsirləndiklərini bildiriblər. Sosial şəbəkələrdə yayılan rəylərdə qeyd olunur ki, onun təqdimatı iştirakçılara həm düşünmək, həm də ümidlənmək üçün yeni baxış bucağı qazandırıb.
Beləliklə, dünya şöhrətli fotoqrafın Çindəki fəaliyyəti, Qarabağ həqiqətlərinin beynəlxalq auditoriyaya çatdırılması baxımından əhəmiyyətli addım kimi dəyərləndirilir.
© Yenifikir.media
Arzu, təklif və şikayətlərinizi bizə bildirin