SPECA Forumunda Azərbaycan modeli diqqət mərkəzində: regional əməkdaşlıq və investisiya islahatları təqdim olundu

Türkmənistanın paytaxtı Aşqabadda keçirilən SPECA İqtisadi Forumunda Azərbaycanın regional əməkdaşlığa verdiyi töhfələr və ölkədə aparılan iqtisadi islahatlar beynəlxalq iştirakçıların diqqətinə çatdırılıb.BMT-nin Mərkəzi Asiya ölkələrinin İqtisadiyyatları üçün Xüsusi Proqramı (SPECA) çərçivəsində təşkil olunan forum “Beynəlxalq Sülh və Etimad İli: Dayanıqlı İnkişaf naminə regional qarşılıqlı əlaqəlilik” mövzusuna həsr edilib. Açılış sessiyasına Türkmənistanın maliyyə və iqtisadiyyat naziri Mammetqulı Astanaqulov sədrlik edib. UNECE və UNESCAP rəhbərlərinin videomüraciətləri tədbirin beynəlxalq əhəmiyyətini ön plana çıxarıb.
Forumda Azərbaycanı iqtisadiyyat nazirinin müavini Rövnaq Abdullayev təmsil edib. O, çıxışında SPECA platformasının regionda sülhə əsaslanan iqtisadi inteqrasiyanın gücləndirilməsi baxımından strateji rol oynadığını bildirib.Nazir müavini qeyd edib ki, Azərbaycanda son illər iqtisadiyyatın neftdən asılılığının azaldılması, qeyri-neft sektorunun genişləndirilməsi, investisiya mühitinin liberallaşdırılması və biznes üçün şəraitin yaxşılaşdırılması istiqamətində ardıcıl addımlar atılır. Onun sözlərinə görə, hazırda süni intellektin iqtisadiyyata tətbiqi üzrə yol xəritəsi hazırlanır, beynəlxalq yükdaşımalar üçün Rəqəmsal Logistika Platforması artıq praktik istifadəyə verilib.
Rövnaq Abdullayev Azərbaycanın SPECA çərçivəsində Orta Dəhliz və Şimal–Cənub marşrutları vasitəsilə regional nəqliyyat və ticarət əlaqələrinin gücləndirilməsində fəal iştirak etdiyini vurğulayıb. Bildirilib ki, Bakı regionlararası logistika və ticarət mərkəzinə çevrilməkdədir və bu proses ümumi dayanıqlı inkişafa xidmət edir.
Forumda Tacikistan, Qazaxıstan, Qırğızıstan, Türkmənistan və Özbəkistanın yüksək vəzifəli nümayəndələri də iştirak edərək regional iqtisadi inteqrasiyanın gələcək istiqamətləri ətrafında fikir mübadiləsi aparıblar.
Qeyd olunub ki, 21–22 yanvar tarixlərində forum çərçivəsində Transxəzər məkanında enerji əlaqəliliyi, Avropa–Asiya nəqliyyat marşrutlarının səmərəliliyinin artırılması və rəqəmsal ticarət dəhlizlərinin formalaşdırılması mövzularında panel sessiyalar keçirilib.
Ekspertlərin fikrincə, SPECA platformasında Azərbaycanın təqdim etdiyi iqtisadi model regionda investisiya axınının sürətlənməsinə və yeni əməkdaşlıq mexanizmlərinin yaranmasına imkan yaradır.