10 May Azərbaycan xalqının Ümummilli Lideri, müasir müstəqil Azərbaycanın memarı və qurucusu Heydər Əliyevin doğum günüdür. Bu əlamətdar gün xalqımız tərəfindən hər il böyük hörmət və ehtiramla qeyd olunur. Ulu Öndər Heydər Əliyev təkcə Azərbaycanın deyil, bütün türk dünyasının yetişdirdiyi ən böyük siyasi liderlərdən biri kimi tarixə adını qızıl hərflərlə yazdırmışdır.
Heydər Əliyev həyatını və fəaliyyətini daim xalqına xidmətə həsr etmiş, Azərbaycanın inkişafı, dövlətçiliyinin möhkəmlənməsi və xalqın rifahı naminə yorulmadan çalışmışdır. Onun rəhbərliyi dövründə Azərbaycan böyük inkişaf yolu keçmiş, ölkəmizin beynəlxalq nüfuzu daha da artmışdır. Ulu Öndərin uzaqgörən siyasəti nəticəsində Azərbaycan çətin və mürəkkəb dövrlərdən uğurla çıxaraq sabitlik və inkişaf yoluna qədəm qoymuşdur.
1993-cü ildə xalqın təkidli tələbi ilə hakimiyyətə qayıdan Heydər Əliyev ölkədə baş verən xaosun, siyasi böhranın və parçalanma təhlükəsinin qarşısını aldı. Onun qətiyyəti və güclü liderlik qabiliyyəti sayəsində Azərbaycanda sabitlik bərpa olundu, dövlət quruculuğu prosesi sürətləndi və iqtisadi inkişafın təməli qoyuldu. Məhz Ulu Öndərin rəhbərliyi ilə həyata keçirilən neft strategiyası Azərbaycanın gələcək inkişafında mühüm rol oynadı və ölkəmizin dünya dövlətləri arasında mövqeyini gücləndirdi.
Heydər Əliyev gənclərə hər zaman xüsusi diqqət və qayğı ilə yanaşırdı. O inanırdı ki, Azərbaycanın gələcəyi məhz savadlı, vətənpərvər və güclü gənclərin əlindədir. Təhsil, elm, mədəniyyət və idmanın inkişafı üçün atılan addımlar onun xalqına və gələcək nəsillərə olan böyük sevgisinin göstəricisi idi.
Ulu Öndərin söylədiyi “Mən fəxr edirəm ki, azərbaycanlıyam!” kəlamı bu gün hər bir azərbaycanlının qürur mənbəyinə çevrilmişdir. Onun ideyaları, dövlətçilik prinsipləri və siyasi irsi bu gün də yaşayır, Azərbaycan dövlətinin inkişaf yoluna işıq tutur. Prezident İlham Əliyev tərəfindən Ulu Öndərin siyasi kursu uğurla davam etdirilir və Azərbaycan daha da güclənərək yeni nailiyyətlər qazanır.
Bu gün Heydər Əliyevin doğum günündə onun əziz xatirəsini böyük ehtiramla yad edir, Azərbaycan dövləti və xalqı qarşısındakı misilsiz xidmətlərini dərin minnətdarlıq hissi ilə anırıq. Ulu Öndərin adı Azərbaycan tarixində daim yaşayacaq və gələcək nəsillər tərəfindən hörmətlə xatırlanacaqdır.
Saila Salahova
© Yenifikir.media
Arzu, təklif və şikayətlərinizi bizə bildirin