Piyada vurma hadisələrinin təhlili göstərir ki, yol-nəqliyyat qəzalarının mühüm hissəsi piyadaların qaydalara əməl etməməsi nəticəsində baş verir. Müşahidələrə görə, çoxlu sayda hadisə piyadaların yolu təyin olunmamış yerlərdən keçməsi, nəqliyyat vasitələrinin qarşısına qəfil çıxması və ətrafı lazımi şəkildə qiymətləndirməməsi ilə bağlıdır. Bu cür diqqətsizlik tez-tez ağır nəticələrə gətirib çıxarır.
Baş Dövlət Yol Polisi İdarəsi bildirir ki, təhlükəsizliyin təmin edilməsi üçün piyadalar yalnız piyada keçidlərindən, yeraltı və yerüstü keçidlərdən istifadə etməli, svetoforun siqnallarına riayət etməlidir. Hərəkətə başlamazdan əvvəl sürücülərlə göz təması yaratmaq da mühüm amil kimi vurğulanır.
Yolu keçərkən mobil telefondan istifadə, qulaqcıq taxmaq və dayanan avtomobillərin önündən qəfil yola çıxmaq qəzaların əsas risk faktorları sayılır. Yol Polisi bu kimi hərəkətlərin sürücülərin piyadanı görməsini və vaxtında reaksiya verməsini çətinləşdirdiyini bildirir.
Baş Dövlət Yol Polisi İdarəsi piyadaları bir daha diqqətli olmağa və qaydalara ciddi əməl etməyə çağırır. Qurumun xəbərdarlığında qeyd olunur ki, təhlükəsiz davranış təkcə piyadanın öz həyatını deyil, digər hərəkət iştirakçılarının da təhlükəsizliyini qoruyur.
© Yenifikir.media
Arzu, təklif və şikayətlərinizi bizə bildirin