Danimarkanın Kopenhagen şəhərində keçirilən Avropa Siyasi İcmasının 7-ci Zirvəsi çərçivəsində Azərbaycan Prezidenti İlham Əliyev ilə Ermənistan Baş naziri Nikol Paşinyan arasında görüş baş tutub. Bu görüş regionda sülhün möhkəmləndirilməsi baxımından mühüm addım kimi qiymətləndirilir.
Tərəflər ABŞ Prezidenti Donald Trampın təşəbbüsü ilə Vaşinqtonda əldə olunan razılaşmaların əhəmiyyətini vurğulayıblar. Hər iki lider bir daha Azərbaycan və Ermənistan arasında dialoqun və sülh prosesinin davam etdirilməsinə hazır olduqlarını bildiriblər.
Politoloq Əli Oruclu Yenifikir.media-ya açıqlamasında bildirib ki, bu görüş uzun müddət gərgin olan münasibətlərin normallaşmasına yönələn əhəmiyyətli siqnaldır. Belə görüşlər regionda etimadın bərpası və birgə layihələrin həyata keçirilməsi üçün yeni imkanlar yarada bilər. Eyni zamanda, Kopenhagendəki format ABŞ və Avropa tərəfdaşlarının vasitəçiliyi ilə sülh prosesinə beynəlxalq dəstəyin mövcud olduğunu göstərir.
Görüşdən çıxan nəticələr gələcəkdə bölgədə iqtisadi və siyasi əməkdaşlığın inkişafı üçün əsas istiqamətləri müəyyənləşdirə bilər. Liderlərin açıq dialoqa hazır olduqlarını nümayiş etdirməsi tərəflər arasında gərginliyin azalmasına və dayanıqlı sülhün təmin olunmasına müsbət siqnaldır.
© Yenifikir.media
Arzu, təklif və şikayətlərinizi bizə bildirin