Bu gün Ulu Öndəri xatırlayırıq

Bu gün Ulu Öndər Heydər Əliyevin anım günüdür. Onu xatırlayanda insanın içində qəribə bir sakitlik, güvən və qürur hissi yaranır. Çünki o elə bir şəxsiyyət idi ki, adı çəkiləndə belə adam özünü daha arxayın hiss edirdi.

Heydər Əliyevin ən təsirli cəhətlərindən biri onun baxışları idi. Bəzən bir söz deməyə ehtiyac qalmırdı. Təkcə bir baxışı kifayət edirdi ki, ətrafında olan hər kəs davranışını, yerini və məsuliyyətini anlasın. O baxış adamı tərbiyə edir, diqqətə çağırır və ciddiləşdirirdi. Onun baxışında həm tələb, həm də bir ata qayğısı vardı.

O, dövlət işinə çox məsuliyyətlə yanaşan bir insan idi. Elə sahə yox idi ki, diqqətindən kənarda qalsın. Təhsil, mədəniyyət, sənaye, kənd təsərrüfatı — hamısına eyni ciddiliklə yanaşırdı. Onun üçün ölkə bir sistem idi, hər detal önəmli idi. Bir yerdə problem varsa, o bilirdi ki, bu başqa sahələrə də təsir edəcək. Ona görə də hər şeylə şəxsən maraqlanırdı.

Heydər Əliyev insanların içində olmağı sevən lider idi. Tez-tez bölgələrə gedir, insanlarla üz-üzə danışırdı. Onun yanında olan insanlar rahat danışa bilirdi. Çünki o əvvəlcə adamı dinləyir, sonra məsələni həll etməyə çalışırdı. Onun sadəliyi insanları heyrətləndirirdi. Böyük bir şəxsiyyət idi, amma insana yaxın idi.

O, sakit səs tonu ilə danışsa da, sözləri çox təsirli idi. Dediyi hər cümlə bir mesaj idi. Onun müəyyən etdiyi qaydalar ölkədə nizam yaradırdı. Çünki hamı bilirdi ki, Heydər Əliyev nə desə, onu da edəcək.

Heydər Əliyev elə bir insan idi ki, onun böyüklüyünü bir cümlə ilə izah etmək çətindir. O həm güclü dövlət adamı, həm də humanist bir insan idi. Onun gördüyü işlər bu gün də görünür, təsiri bu gün də davam edir. O, Azərbaycan üçün təkcə bir dövr idarə etmədi — gələcək nəsillər üçün yol açdı.

Bu gün biz onu xatırlayanda yenə eyni hissləri yaşayırıq: güvən, qürur və minnətdarlıq. Çünki o, tək və əvəzsiz idi. Onun adı bu gün də insanlara güc verir.

Heydər Əliyev yaddaşımızda yaşayan bir lider deyil, o, böyük şəxsiyyətdir.

Tural Qoca