Müasir hərbi texnologiyaların sürətli inkişafı müharibələrin xarakterini və döyüş strategiyalarını dəyişir. Süni intellekt, pilotsuz uçuş aparatları, robototexnika və kibertəhlükəsizlik sistemləri hərbi əməliyyatların mühüm istiqamətlərinə çevrilir. Bu şəraitdə müdafiə sənayesinin inkişafı və texnoloji müstəqilliyin gücləndirilməsi dövlətlərin milli təhlükəsizliyi baxımından xüsusi əhəmiyyət daşıyır.
Milli Məclisin deputatı Mircəlil Qasımlı “Yeni Fikir”ə açıqlamasında bildirib ki, süni intellekt müasir müharibələrin xarakterini dəyişsə də, strateji qərarların qəbulunda, milli təhlükəsizliyin təmin edilməsində və mənəvi məsuliyyətin daşınmasında insan amili həlledici rolunu qoruyacaq.
Deputatın sözlərinə görə, Azərbaycan müasir hərbi texnologiyaların tətbiqi sahəsində mühüm təcrübəyə malikdir. Xüsusilə İkinci Qarabağ müharibəsində pilotsuz uçuş aparatlarından effektiv istifadə yeni texnologiyaların hərbi əməliyyatlarda əhəmiyyətini nümayiş etdirib. Süni intellektin müdafiə sistemlərinə inteqrasiyası, yerli hərbi sənayenin inkişafı və peşəkar kadr hazırlığı Azərbaycanın bu sahədə imkanlarını daha da gücləndirə bilər.
M.Qasımlı qeyd edib ki, gələcəyin müharibələri yalnız döyüş meydanında deyil, həm də informasiya və rəqəmsal məkanda aparılacaq. Onun fikrincə, kibertəhlükəsizliyin gücləndirilməsi, milli informasiya infrastrukturunun qorunması və süni intellekt əsaslı müdafiə sistemlərinin inkişaf etdirilməsi Azərbaycanın milli təhlükəsizliyinin əsas prioritetlərindən olmalıdır.
Deputat süni intellektin hərbi əməliyyatlarda tətbiqinin hüquqi və etik tərəflərinə də diqqət çəkib. O bildirib ki, bu texnologiyalardan istifadə zamanı insan həyatının qorunması, beynəlxalq humanitar hüququn tələblərinə riayət olunması və qəbul edilən qərarlara görə məsuliyyətin insan üzərində qalması əsas prinsiplər olmalıdır.
Mircəlil Qasımlının sözlərinə görə, müdafiə sənayesində süni intellekt və robototexnika sahələrinə investisiyaların artırılması, yerli istehsalın genişləndirilməsi və milli mütəxəssislərin hazırlanması ölkəmizin müdafiə qabiliyyətinin və texnoloji müstəqilliyinin gücləndirilməsinə töhfə verə bilər. ADEX kimi beynəlxalq sərgilər isə müasir müdafiə texnologiyalarının nümayişi və bu sahədə əməkdaşlıq imkanlarının genişləndirilməsi baxımından mühüm platformadır.
Deputat vurğulayıb ki, gələcək müharibələrdə nəticəni yalnız silahların gücü deyil, həm də texnoloji üstünlük, operativ informasiya əldə etmək və süni intellekt imkanlarından səmərəli istifadə etmək bacarığı müəyyənləşdirəcək. Azərbaycanın əsas hədəfi isə yerli hərbi sənayeni inkişaf etdirmək, texnoloji asılılığı azaltmaq və müdafiə sahəsində rəqabətqabiliyyətliliyini artırmaq olmalıdır.
Şəlalə Camal
© Yenifikir.media
Arzu, təklif və şikayətlərinizi bizə bildirin